Vouiatge en Russio souvietico

                                    Vouiatge en Russio souvietico

Quauques jiours daprès partission, à travers la sèuvo soubre la ribo esquèro de l’Enissèi, vel sud, en esquivant li vilatges per leissa pas de traulhos. Quand eran fourçats d’i passa pamen, eran plô recebuts per li païsôs, que devinabou pas nouste deguisomen; e vezion plô que detestabou li bolsheviks que lour aviou destrut forço vilatges. A un endrèit, nous diguèrou qu’un destacomen de l’armado roujo èro estat emvouiat de Minousinsk per chassa li Bloncs. Fougueran coustrenchs de nous espassa dei ribos del Ienissèi e de nous escoundre pels bosce e per lei mountonhos. I demoureran uno quingenado: d’aquel temp li soudats roujes traversabou la regiou, agantàbou pels boscs d’ouficiers desarmats; aquéssi d’aqui, miech-nuds, s’escoundiou en cranhent l’orro venjanço di bolsheviks. Mai tard traverseran una sèuvo ounde trouberan li cos de vint-e-uèit ouficiers penjats is aures, la caro e lou cos mutilats. Decideran de pas jamai toumba vivents entre lei môs di roujes. Avion per acò noustos armos e una prouvendo de cianure de poutassioum.

                                        

En passant un afluent del ’Ienissèi, vegueran un jiour un passatge estrèit e palunous. Sa dintrado èro claufido de cadabres d’ome e de chavals. Mai lonh, un trinèl asclat, de malos defounçados, e de papiers escampilhats. Tout pròchi, de fardos desquissados e d’àutri cadabres. Quau èrou aquéli pàuri gents ? Quonho tragèdio s’èro debanado aqui ? Trouberan també lou cos d’una malirouso que sa coundiciou dizio claromen ço que li aviou fach abans de la delibra d’una cartoucho apazimairo. Lou cos èro jagut à coustat d’un abric de foulham, ple de boutilho e de boùstios de servo, que diziou l’ourgìo qu’avio precedat lou crime.

Mai avançaban vel miejour, mai li gents èrou espitaliers e oustils i boulshevics. Sauteran enfi de la sèuvo e atenheran lis imensos tepos de Minousinsk, traversados per la nalto cadeno de mountonhos roujos, qu’on souno Kizill-Kaya, salpicados de lacs salats. Acò’s la regiou di vièlhs toumbèls, de milierats de pèiros levados, bèlos e pichounos, moumuments funeràris di primiers tenents del païs. De piramidos de pèiro de detz metres d’aussado demorou per marca la routo de Genghis Khan din sa marcho de counquisto, puèi de Tamerlan. De milierats de pèiros levado e de piramidos s’estirou interminablomen vel nord. Acò’s din aquessos plonos que li Tartares viscou desenant. Pilhats per li boulshevics, lis azirou. Lour digueran franchomen que fugission. Nous dounèrou graciousomen per minja, nous beilèrou de guidos, e nous endiquèrou ounde poudion nous arresta e nous escoundre en cas de perilh.

Quauques jiours après, dempuèi la ribo de l’Enissèi, vezion lou primier batèu à vapour, l’Oriol, qu’anabo de Krasnouiarsk à Minousinsk, chargat de souldats roujes.

Arriberan prou lèu à la boucho de la Tuba que devion segre din nouste vouiatge vers l’èst, fin li mount Sayan ounde coumenço l’Urianhai. Counsideraban que l’etapo loung de la Tuba e de soun afluent l’Amyl èro la partido la mai perilhouso de nousto routo, que lei valados d’alai aviou uno poublaciou noumbrouso qu’avio fournit belcop de souldats i partidàris coumunistos Schetinkin e Kravchenko.

Un Tatare nous faguè passa, ammé noùsti chavals, soubre la ribo drèito de l’Enissèi. A l’albo, nous mandè quauques Cousaques que nous guidèrou fin la boucho de la Tuba. Nous repauseran pièi touto la journado e fagueran una vertadièro tampounado de cassis e de cirèios sóuvajos.